الكلمـــــــات

الدنيا كلام ... بنسمعه او بنقراه او بنشوفه او بنفكر فيه... بس فى النهايه مجرد كلام

Name:
Location: Cairo, Egypt

Wednesday, June 28, 2006

ارهاق


نفسى اناااااااااااااااااااااااااااااام
حاسس انى باجرى بقالى سنين
وما نمتش
نفسى فى نوم طويــــــــــــــــــــــــل من غير احلام
نوم محايد ما فيهوش اضطرابات
نوم مش هاصحى بعده على مشاكل او ضغوط اواحلام او اوهام

مين الى قال ان الموت افضل علاج للحمى الى اسمها الحياه؟
......................................
مش فاكر
بس جمله عبقريه

Tuesday, June 20, 2006

بدون عنوان

فيه كام شهيد مات النهارده؟
حدش شاف نشره الاخبار؟
فيه كام بلد صاحى وما نامش؟
علشان جنازه للثوار
الفين عمار يا مصر
الفين عمار
ابو الهول اصله اسد
اصبح حمار
راكبه خواجه مفترى
شايل مسدس امريكانى
كسبانه من لعبه قمار


دم الشهيد راح فى التراب
والضى قرب يختفى
والاسئله من غير جواب
ونور بلادنا بينطفى
والمعجزات خلصت خلاص
با قى حقيقه مجرده
باقى سؤال من غير جواب
محتاج اجابه محدده
بس الجواب يوم الحساب
يوم ما يتعروا الكلاب
وتزول عروش
قعدت عليها كروش فاشوش
يتحاكموا ما يتحكموش
يوم ما تسود الوشوش
وشهيدنا وشه ينتشى
يضحك يرفرف بجناحين
جناح فرح وجناح حزين
وجناح يغنى غنوتين
غنوه على الدم اللى راح
غنوه على الارض البراح
غنوه على جنود الزمان
صدى فى ايديها السلاح
غنى وعلى الصوت كمان
ده صوت غنا ولا نواح؟
ولا يكونش صوت فرح؟
ولا اجابه عالسؤال
الى اجابته من المحال
فيه كام شهيد مات النهارده؟
....قومى يا مصر
حوشى الحقى ..عدى العيال


Wednesday, June 14, 2006

!!!!! بنــــــــــــــــــــــــــــــت


عرفنا نوع البيبى على السونار اول امبارح
طلعت بنوته
طبعا انا ضربت لخمه وفضلت متنح لحد ما روحنا
انا ما اعرفش اى حاجه عن تربيه البنات
يعنى بالنسبه للولد انا كنت عارف ومخطط
هيخش مدارس شكلها ايه
وهيلعب رياضه عند سن كام
وحتى لما نخرج مع بعض هنروح فين
لكن بنت؟؟؟
!!!!!!!!!!!!!
ده انا حتى ما فكرتش اوى اسميها ايه
مامتها بتقترح سلمى او حبيبه
ايه رايكم؟؟
حد عنده اسم بنت حلو وجديد
مع مراعاه انه ما يكنش معناه انها حلوه اوى
عشان فيه احتمال مش قليل انها تطلع شكلى
:)

Saturday, June 10, 2006

الحقيــــــــــــقه


بعد ان شاهدت القاضى- رئيس المحكمه- بالامس فى برنامج وائل الابراشى على قناه دريم
وهو يشرح كيف تم الاعتداء عليه من قبل ضباط الامن
وبعد ان تخيلت نفسى وانا امر فى شارع عبد الخالق ثروت بالصدفه
انا المراقب السلبى الذى لم يخرج فى مظاهره فى حياته
وفى نفس الوقت لا يملك اى ضهر يحميه
-هو فيه ضهر اكبر من رئيس محكمه؟-
وبعد مراجعه كل الاحتمالات الممكنه والاصابات المتوقعه

اعتقد ان قرار السفر ليس ترفا كما كنت اظن

Monday, June 05, 2006

شفره دافينشى


الصديق مأمون المغازى
كتب فى موضوع هام
نرجو التواصل و ابداء الراى

شفرة دافينشي...ليست مجرد فيلم