الشرطه في خدمه الشعب

http://www.youtube.com/v/tXoPNI7px2U
مصر هي امي

تـــــــــــــــــــــاج

اول مره يتعملي تاج
يتعملي مرتين
المدون لما يسعد بقي
حلم وزبادي عايزيني اجاوب علي الاسئله دي

يا هادي

هل أنت راض عن مدونتك شكلاً وموضوعاً؟
لا خالص

ـــ هل تعلم أسرتك الصغيرة بأمر مدونتك؟
الصراحه مراتي بس اللي تعرف

ـــ هل تجد حرجاً فى أن تُخبر صديقاً عن مدونتك؟
مش حرج بس قيد
يعني بعد كده هابقي باكتب وهو في دماغي
وبعدين انا مش كاتب
انا بافضفض هنا وبس
عشان كده احب ابقي حر
انا قلت لمراتي بس عشان ما يبقاش بينا اسرار

هل تعتبرها أمرا خاصا بك؟
بالظبط
هو ده

ـــ هل تسببت المدونات بتغيير إيجابى لأفكارك؟
طبعا

اعطنى مثال فى حالة الاجابة نعم
التدوين نفسه غير فيا حاجات كتير
يعني بقيت بافكر واحلل كل حاجه باشوفها عشان الاقي التدوينه الجديده
ده غير المشاكل السياسيه والاجتماعيه اللي بقيت غصب عني مهموم بيها اكتر من الاول

ـــ هل تكتفى بفتح صفحات من يعقبون بردود فى مدونتك أم تسعى لاكتشاف المزيد؟
ساعات وساعات
بس بافرح اوي لما الاقي مدونه حلوه عشان ده معناه مكان جديد يستاهل الزياره

ـــ ماذا يعنى لك عداد الزوار.. هل تهتم بوضعه فى مدونتك؟
زي ارقام التوزيع بالنسبه للصحفي
بصراحه شويه شويه بدات احس اني باكتب عشان العداد ده يزيد

ـــ هل حاولت تخيل شكل اصدقائك المدونين؟
يمكن بس مش كلهم

اعترفـــ هل ترى فائدة حقيقية للتدوين؟
والله هو مكان هايل للفضفضه وتسجيل لحظات مهمه في حياه المدون
ده غير التواصل مع ناس انت عارف انهم ليهم فكر
ناس دماغ يعني

ـــ هل تشعر أن مجتمع المدونين مجتمع منفصل عن العالم المحيط بك أم متفاعل مع احداثه؟
اطلاقا
المدونين هما المصريين بانواعهم
الطالب والمهندس والدكتور و المسلم والمسيحي

ـــ هل يزعجك وجود نقد بمدونتك ؟ أم تشعر انه ظاهرة صحية؟
ما حصلش قبل كده
بس انا عموما باتخنق لما حد بينقدني
لكن لما اعد مع نفسي بعدها
امخمخ واستفيد

ـــ هل تخاف من بعض المدونات السياسية وتتحاشاها؟ هل صدمك اعتقال بعض المدونين؟
مش باخاف منها
بس مش باخشها بانتظام
عموما انا باحب المدونات الادبيه والشخصيه اكتر
بيبقوا ادفي
واعتقال المدونين ما صدمنيش قد ما حسسني ان النظام بدأ يتغير ويخاف بعد ما كان بيسيب الناس زمان تهاتي مع نفسها

ـــ هل فكرت فى مصير مدونتك حال وفاتك؟
اهي هتفضل متلقحه للذكري
وبعدين مش هابقي فاضيلها ساعتها

ـــ آخر سؤال : تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك؟
قول معايا قول بجد
وجيه عزيز

ـــ اكتب اسماء خمسة مدونين ليقوموا بهذا الاستقصاء بعدك
سانتا كريم - حدوته لو بتيجي هنا اساسا - سهروردي - انتوك - نعناعه

ملحوظــــــــــــه

راح في حادثه العباره لوحدها اكتر من اللي مات لحد دلوقتي في حرب لبنان
ده غير قطر الصعيد ومسرح بني سويف وحرب البدو في سينا وغيره وغيره

ما بقيتش عارف مين الاسوء
الصهاينه والامريكان
ولا الفساد والحكومات العربيه

عشان كده باقترح زي ما فيه جريمه حرب
يبقي فيه جريمه حكم

ولا تسقط بالتقادم

ملحوظه 2 - تحديث

هادي نصر الله استشهد وهويقاتل في الخطوط الاماميه
و جواد نصر الله يقاتل الان في الخطوط الاماميه
و جيمي ابن سوزي بيصيف مع خوخه

عدت سنـــــــــــــــه

النهارده اول اغسطس
يعني تقريبا فات سنه علي افتتاح المدونه
من قبل كده بشويه رماني جوجل عند حدوته اللي كنت وما زلت باعتبرها ملكه جمال التدوين
واكتر انسان موهوب قريتله في حياتي
ومن يومها عرفت العالم السحري الافتراضي اللي اسمه تدوين
كنت قاريء لفتره تابعت خلالها كريم المصمم الساحر
ولست ادري ونعناعه اللي بمجرد ما تقرالهم تحس انهم اخواتك البنات
وبعد ما بدأت اكتب زادوا الاصحاب
عرفت غاده اللي مع نفسها
ومحمد هشام بلدياتي الموهوب اللي ان شاء الله ليه مستقبل كبير
وكروان ونور اللي احساسهم مش عادي
وياسر اللي باحس انه لوفيه منصب رئيس تحرير التدوين هيبقي احسن واحد يمسكه
وجيرونيمو المكتأبه دائما الموهوبه برضه دائما
وماشي الطريق المختلف اللي ما فيش مدون تاني شكله
وزنجي وسهروردي اللي مليانين حياه
وزبادي الصعيدي الاصيل
وعم احمد شقير كبير القعده اللي ربنا يرد غربته
وجدو اللي باحس انه بيطل مننا علي مصر اللي واحشاه اوي حتي لما بيبقي فيها
وانتوك وانتيكه اللي موجودين في كل حته والتدوينه اللي ما يعلقوش عليها تبقي ناقصه حاجه
وعم فتحي واستاذ مأمون شعرا العاميه والفصحي الجامدين
وغيرهم وغيرهم
ناس كتير دخلوا حياتي وبقوا جزء من يومي وفهمي للاحداث
باحكيلهم عني وعن احلامي
عن متاعبي واحباطاتي
حتي عن بنتي اللي جايه
الموضوع ما بقاش موقع علي النت مهما كانت خصوصيته
الموضوع بقي عشره وحب ودفا
وعشان كده في عيد ميلاد الكلمات
شكرا لوجودكم
شكرا اوي
:)