مي خاطر صاحبه الورقه والقلم عملتلي تاج
يا مسهل
أحب شخص لقلبك فى الدنيا ؟
بصراحه مراتي وبنتي بيتنازعوا علي المركز ده من ساعه حبيبه ما اتولدت بس قبل كده كانت نيفين مراتي بدون منازع
انسان مستعد تضحي بحياتك – ركز فى كلمة حياتك - عشانه؟
برضه بصراحه اي حد اوقضيه تستاهل
انا اصلا متقبل فكره الموت وشايف فيه راحه كبيره
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك ؟
لااااااااا ناس كتير اوي
ودي اكيد اجابه كل اللي عايشين في مصر
ما هواسم أجمل كتاب كتبه بشر قرأته ومحتفظ به حتى الان؟
مجموعه قصص قصيره بس الكاتب مش مشهور اسمها لا تسالوا عن عنوان انها الحرب
انت متعلق بيه وبتقرأه كل فترة؟
ايوه بس واحد من حبايبنا استلفه من فتره وما جابوش
اهم جهاز منزلى انت متعلق بيه او بتستخدمه كتير؟
التليفزيون
لان انا باشتغل طول اليوم علي الكمبيوتر وما باقدرش اقعد عليه تاني لما اروح
شىء تحس بالراحة النفسية عندما تنظر اليه؟
أرض خضراء
بحر
حبيبه بنتي
مكان تحس فيه بالحنين الى شىء لا تدرى ماهو و ذكريات جارفة الى لاشىء؟
بير مسعود في اسكندريه
اجمل مدينة زرتها داخل مصر؟
اسكندريه طبعا
أجمل مكان طبيعي رأيته داخل مصر؟
صخره كده في الغردقه كنت باحب اقعد عليها
شخصية كارتونية بتحبها؟
معتز الدمرداش :)
نوع هاتفك المحمول؟
نوكيا 6630
سرعة بروسيسور جهازك؟
3 GHz
حجم ذاكرة –هارد- جهازك؟
80 جيجا
المساحة التى تشغلها المواد الاسلامية على جهازك؟
عندي القرأن بصوت الشيخ عبد الباسط بس
اي حاجه تانيه باشوفها وباشيها
نفس المساحة السالف ذكرها فى قلبك-الاجابة لنفسك عشان الرياء يا اخواننا-؟
اممممممم
جاوبت
أهم هدف انت واضعه لحياتك دلوئتى؟
اتقاعد :)
مواصفات فتاة الأحلام بالنسبة لك ؟
لا انا اتجوزت خلاص
الاحلام يعاقب عليها القانون
صف ما يأتى
شعورك لما بتسمع كلمة مصر ؟
حزن شديد اوي
شعورك لما بتسمع كلام عن اليهود؟
زي شعوري وانا باقتل برص بالظبط
قرف وغل مع شويتين قسوه
شعورك لما بتشوف ظابط شرطة؟
للاسف قريب من شعوري لما باسمع عن اليهود
لون البطانية اللى بتتغطى بيها فى الشتاء؟
يا سلام
طب انا باحب اللحاف اكتر من البطانيه
لون الجورب-الشراب- المفضل لديك؟
اهي دي عامله زي ان الكيلو 65 هو الكيلو المفضل بالنسبه لي في الصحرا
احساسك اذا داست قدمك فى الطريق على مخلفات اخراج حيوان- *** ولا مؤاخذة-؟
ابدا بتحصل عادي يعني
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
والله باقول ربنا يكرمه ويثبته
ما احنا زي ما مجتمعنا بيكفل حريه عدم التدين وبنقول دي علاقه بين العبد وربه وما حدش وصي علي حد لازم كمان نكفل الحريه للتدين طالما ما بيأذيش حد
احساس يراودك فى اشارة مرور مغلقة بسبب مسئول كبير؟
والله بيبقي صعبان عليا
يعني ربنا عدل وهيحاسبه علي قد ما عطل الناس وبهدلهم
والناس بتبقي واقفه عماله تدعي علي اللي جابوه والحسابه بتحسب
مين اكتر ست اشخاص بتحبهم ؟؟؟
افراد عيلتي طبعاوابراهيم صاحبي
هل أنت سعيد ؟
ساعات وساعات
بس اليومين دول لأ
لو اجتمعت مع حسنى مبارك فى مكان واحد هتعمل ايه ؟
ولا حاجه
لو معايا مليون ونص أعمل ايه ؟
هاعزل انا وعيلتي اسكندريه
وافتح مشروع نعيش منه كويس
وافتح انا محل ورد اومكتبه صغيره واقعد فيها
بتحب مصر ؟
والله ما عدت عارف
أنت مسلم ؟
الحمد لله
ليه ؟
في الاول عشان اتولدت كده
وبعد كده انا مريت باوقات كنت قريب فيها اوي من ربنا - للاسف دلوقتي مش منهم - وكنت باحس انه بيختارلي وبيبعتلي اشارات واضحه جدا والعلاقه دي طبعا كانت من خلال عبادات اسلاميه مش صله حره يعني
مين أكتر شخصية متقدرش تستغنى عنها ؟
حبيبه
سبتها ومامتها في المنصوره مره يومين كنت هاتهطل
ايه أكتر موقف محرج ؟
مره امي قفشتني كنت مزوغ من المدرسه ورايح السينما
بس لميت الموضوع وكدبت الكدبه التمام
ورحت السينما برضه :)
الأمنية اللى اتمنى تحقيقها ؟
نفسي بنتي ما تحزنش ابدا وتبقي مرتاحه في بلدها وفي حياتها
التاج بقى يتمرر لمين ؟
هو انا مش عارف راح لمين ومين لا
فاي حد ما جاوبوش يتفضل ياخده
