بوست جديد

keeping the blog alive

مغترب خذيان

انا ما استحقش اني اكون مصري
انا ما استحقش اني اكون عايش
انا سبتها وهربت
وفي قلب ثورتها
وفي عز حموتها
عن المعارك غبت
اتلفتت حواليها في الازمه ما لقتنيش
انا لا استحق الهوا
ولا استحق العيش
لقت بدالي ولاد
حلوين كما نيلها
عاليين كما نخيلها
واقفين في وش الكل
بيشيلوا عني الذل
شايلينها في الازمه
ورفضت انا اشيلها
لقت بدالي ولاد
جدعان اوي وشداد
اولادها من قلبهم
مش بس بالميلاد
وانا الل اخري اشوفها في النشره
بتصارع الطغيان
بتكسر الجبروت
وبتنصر الغلبان
وتنفض النسيان
باشوفها في النشره
واقلب القنوات
اتوقع الاتي
واحلل اللي فات
وابكي علي اللي مات
مفروض مكاني هناك
مكاني اكون وسطهم
ابوس علي رجلهم
ولما استشهد اموت وانا في حضنهم
يا مصر سامحيني
خلعوني من ديني
طردوني من ارضك
سامحيني انا في عرضك
صحيح انا نسيتك
اوعي انتي تنسيني
لكن وعهد الله
لارجع واعيش فيكي
ولو باقيلي نفس
انا هاوهبه ليكي
هاتنفسه بيكي
يا ساكنه منا الروح
ارواحنا نهديكي
انا راجع اناديكي
انا راجع اداديكي
الاقيني والاقيكي
وابقي صحيح مصري
ابقي صحيح ولدك
من ضمنة الاولاد
اللي حماسهم زاد
جدعان اوي وشداد
اولادها من قلبهم
مش بس بالميلاد

قبل ........ بعد

بعد اكتر من سنه تمرين وتخسيس
وبعد اكتر من تلاتين كيلو نزول
اقدر اتنفس بعمق واقول الحمد لله

حاجـــــــــــــــــــــــــــات

حاجات حاجات حاجات
من اول لما عاش
ولساعه لما مات
وحياته حاجات حاجات
حاجات بتعوز سنين
وحاجات بتعوز ساعات
وحاجات علي بال ما تحصل
هيكون العمر فات
وتضيع سنين حياته من اول الميلاد
بيدور في الشوارع
ويفتش في الحارات
بيلف كعب داير
وبيقرا الاعلانات
ويسال العجايز
والصبيان والبنات
امتي الحاجات هتخلص
ويحس بالثبات
امتي هيعيش حياته
ويعوض اللي فات
ويجيله الرد دايما
متشبع بالاهات
عمر الحاجات ما تخلص
ولا يخلص الشتات
عمر الحاجات ما تخلص
ولا حيرته في يوم هتنقص
غير لحظة النهايه
غير ساعة الممات

غنيــــــــــــــــــــــــــــــــــــلي

حبيبه: بابا , غنيلي اغنيه يا شطوره

يا شطوره
يا أموره
يا أحلي بنت في الصوره
يا روح بابا
يا نور عيني
يا كتكوته
وبطوطه
يا أحلي بنت موجوده

الشاطر حســـن ..... نسخه دبي

حبيبه: بابا احكيلي حدوته
انا: كان يا ما كان ولد اسمه الشاطر حسن
اسمه ايـــــــــــــــــه؟
حبيبه : الشاطر حسن
انا: باباه قاله يا شاطر حسن انا مسافر وهاسيبلك اكل
لما يخلص اركب البساط السحري وروح عند النخلتين اللي علي الجبل
باباه سافر
ولما الاكل خلص الشاطر حسن ركب البساط وقاله
وديني فيــــــــــــــــن؟
حبيبه : المول يا بابا
!!!!!!!!!!!!!

اعلانات مبوبـــــــــــــه

مطلوب انسان
ما يهمش دخله
ما يهمش لونه
ما يهمش اسمه
ما يهمش حتي يكون غلبان
لكن المطلوب
انه يكون خالي من الاحزان
يرفض يتهان
يفضل من اول خلقه لحد الموت
انسان

==================

مطلوب اراضي للسكن
والانتماء
مطلوب مواطنين للوطن
مطلوب عصايه للعقاب
مطلوب عتاب
مطلوب علاج للاكتئاب
مطلوب حساب
ويكون عسيــــــر
مطلوب حساب
ويكون هباب

==================

مطلوب حمامه للسلام
اصل الحمامه السابقه
جالها زكام
غصن الزتون اصله ما عادتش في بقها
ضاع منها
وعشان كده
اي حمامه هتشتغل
تجيب معاها غصنها