الاستفتــــــــــــــــاء

انا مش هاتكلم ولا هاقول رايي في الاستفتاء

انا بس هاعرض صوره وهاحكي موقف

الصوره

الموقف

باتصل بوالدتي امبارح اطمئن عليها لقيت الست مفرهده
باسالها مالك ؟
قالتلي انهم شحنوا الموظفين في اتوبيسات وميكروباصات ولفوا بيهم طول اليوم علي كل لجان المنصوره واجبروهم يقولوا نعم في كل لجنه
بس هي كانت مبسوطه اوي
اصلها ضحكت عليهم
بقت تخش وتطلع من غير ما تحط حاجه

:)))

البر التــــــــاني

وخلاص هنسافر
هنعدي الشط التاني
رايحين لبعيد
بيقولوا هناك ما تلاقي فوقاني ولا تحتاني
الكل يعيش مبسوط وسعيد
الظلم حرام
والكره حرام
وهناك الناس دايما قدام
حزمنا حاجاتنا
خلاص ماشيين
سايبين الزحمه في الميادين
سايبين البيت والغيط والناس
فايتين الفاس
فايتين اقلامنا والكراس
فايتين العوزه ومد الايد
فايتين العيد
رايحين لبلاد ما فيهاش رمضان
مافيهاش قرأن
ولا حتي ادان
هنعدي البحر ونتغرب
ونفوت البيت من غير جدران
من غير عمدان
هنشيل في قلوبنا التعبانه كل الاحزان
ونروح نرميها في كل مكان
علي البر التاني
اللي هيكون فيه عنواني
بلد الاحلام
والظلم حرام
والناس دايما واقفين قدام