الشاطر حســـن ..... نسخه دبي

حبيبه: بابا احكيلي حدوته
انا: كان يا ما كان ولد اسمه الشاطر حسن
اسمه ايـــــــــــــــــه؟
حبيبه : الشاطر حسن
انا: باباه قاله يا شاطر حسن انا مسافر وهاسيبلك اكل
لما يخلص اركب البساط السحري وروح عند النخلتين اللي علي الجبل
باباه سافر
ولما الاكل خلص الشاطر حسن ركب البساط وقاله
وديني فيــــــــــــــــن؟
حبيبه : المول يا بابا
!!!!!!!!!!!!!

اعلانات مبوبـــــــــــــه

مطلوب انسان
ما يهمش دخله
ما يهمش لونه
ما يهمش اسمه
ما يهمش حتي يكون غلبان
لكن المطلوب
انه يكون خالي من الاحزان
يرفض يتهان
يفضل من اول خلقه لحد الموت
انسان

==================

مطلوب اراضي للسكن
والانتماء
مطلوب مواطنين للوطن
مطلوب عصايه للعقاب
مطلوب عتاب
مطلوب علاج للاكتئاب
مطلوب حساب
ويكون عسيــــــر
مطلوب حساب
ويكون هباب

==================

مطلوب حمامه للسلام
اصل الحمامه السابقه
جالها زكام
غصن الزتون اصله ما عادتش في بقها
ضاع منها
وعشان كده
اي حمامه هتشتغل
تجيب معاها غصنها

حالنا كلنــــــــــــــــا

غفير سهران
وجنبه النار بيتدفي
بيشرب شاي
ويتفكر في احواله
يشد الشده مالشيشه
ويتنغم
بصوت مشروخ مع الراديو
ويترحم
علي سنينه اللي بيعدو
وبيشدو
في حبل العمر
من طرفه
سنين فاتت
علي السهره
في نفس الحته جنب النار
سنين فاتت وبيعدو
في شرب الشيشه والدخان
ولا نور الصباح يطلع
ولا قلبه صبح دفيان

حط الحمـــــــــــام

حط الحمام علي كتفي اليمين غني
نشد باحلي نغم وقالي اتمني
وطار وما لحقتش اني ارد عليه
يا ابو العيون السود
سبب هروبك ايه؟
روح للحبيب قله
اني واحشني عينيه
مهما البعاد هيطول
انا برضه باستني

فرد جناحه وطار
سرح بعيد في الكون
وسابني باتسائل
ولوحدي متحير
امتي الامل هيعود
يسكن علي كتفي
امتي الامل هيكون
عنده مكان بينا؟