افكــــــــــــــــــــــــار

تحمل هذه التدوينه مجموعه من الافكار سمعتها او فهمتها او فكرت فيها خلال رحلتى الاخيره

انا- باهرج- : تقدر تقولى ايه فرق هنا عن مصر؟؟
صديق سويسرى مصرى : البلاد دي حره يا احمد

**********************

انا : البلد دى خضره جدا
صديق سويسرى مصرى :على فكره سويسرا بتصدر قمح واللى علمهم يزرعوه كانت بعثه من الكنيسه المصريه
الا هى مصر بتصدر ايه دلوقتى؟؟
انا : الطرشه

**********************

انا : اخر مره شفت فيها فيلم عربى كان امتى ؟؟
صديق المانى كان مصرى فى يوم من الايام : ياااااااااه من يجي 6 سنين
معاك حاجه؟؟
انا : معايا
سمعت عن اللمبي؟

**********************

صديق المانى كان مصرى فى يوم من الايام : -يضحك بعد مشاهده اللمبى - الله يخرب بيت العمده الالى بتاعكم خلى الناس اتهبلت

**********************

الناس دى فرافير...... فاكرين نفسهم سياح وهما فى بلدهم

**********************

صديق سويسرى - فى بازل - : دى "لا روش" بيعملوا هنا كل انواع المخدرات لو نزلت هنا ممكن يدوك جرعه ببلاش الناس هنا عاليه طول الوقت

**********************

انا : هو اللى انا شامه ده بانجو
ولا انا بيتهيالى ؟؟
صديق سويسرى - فى بازل - : دى ماريجوانا

**********************

صديق المانى كان مصرى فى يوم من الايام : تعرف فيه احصائيه بتقول ان فى زيورخ من كل اربع بنات فيه بنت شغاله فى المسخره

***********************

انا بعد صلاه الجمعه: هو الراجل التركي ده أذن اربع مرات ليه ؟
صديق المانى كان مصرى فى يوم من الايام : ما تسالش ما تسالش انت مش عملت اللي عليك وخلاص ؟

***********************

صديق سويسرى : مبارك الرئيس المصري هو اقرب حكام المنطقه للرئيس الامريكي ؟
مش كده ؟
يا نهار اسود ...... ده احنا متصيتين يا جدعان

***********************

صديق سويسرى مصرى : ايه اكتر حاجه هتوحشك لما ترجع مصر؟
انا : القطارات و الاسفلت والموز باللبن الى اسمه ايمي

***********************

صديق المانى كان مصرى فى يوم من الايام : ايه مالك ؟
انا : زهقت عايز اروح
صديق المانى كان مصرى فى يوم من الايام : من 10 ايام يا ابنى ؟
انا : ما هو لسه 10 كمان يا عم وبعدين اهلي وحشوني يا اخي
صديق المانى كان مصرى فى يوم من الايام : ده علي كده احنا ولاد كلب بقي؟

***********************

صعب عليا صلاح اوي و هو عمال يفرجني علي المحلات الكبيره والشوارع النضيفه ولسان حاله بيقول: انت ازاي مش مبهور باللي انا سبت مصر عشانه؟؟

***********************

بياع كردي : انا من سوريا
صحيح احنا ما كناش محبوبين هناك
بس احنا زعلنا اوي لما سمعنا اخبار لبنان

***********************

عامل في مطار القاهره : يا محمد بيه
عطوه باشا بيقولك خلص الجوازات دي الاول

انا - واقف اول واحد وباكلم اللي ورايا -: حمد لله علي السلامه
اهو احنا كده وصلنا مصر

الارض باقيــــــــــــــــــــــــــــــــه

الارض باقيه والشعوب باقيه
والدنيا دايره بالعباد ساقيه
مهما افتريتم او غزيتم
مهما افتكرتم او نسيتم
مهما بقيتم
الارض باقيه والشعوب باقيه

الارض وارثه والبشر راحلين
لو دول حياري الجنود جايين
لو دول في توهه هييجي ناس صاحيين
لو دول بينسوا مين صلاح الدين
الارض باقيه والشعوب باقيه

الارض واحده والشعوب بتمر
والارض دي ما سكنها الا الحر
لو يوم دخلها كلب او كلبين
ما يلاقوا فيها الا عذاب القبر

الحكمه واحده والحكيم بيقول
الايد طويله .... بس مش هتطول
الارض دي لمت كتير اجناس
فرس ورومان ويا تتار ومغول
مهما يطول الزمن برضه الغيام بيزول
طول ما الارض باقيه والشعوب باقيه

تحديث

ادخلوا يا جماعه على المدونه دي
http://mkasofa-almaksof.blogspot.com/
شوفوا الصور ياجماعه
حسبي الله ونعم الوكيل
اوعوا تنسوا يا ناس
شوفوا الصور وفرجوها لولادكم
اوعوا تنسوا واوعوا تسيبوا ولادكم ينسوا
حسبي الله ونعم الوكيل

........

ايام كتير بتمر
وبلادنا شاربه المر
والدمع مش بيجف
مستني حاجه تسر
..........

مراسلكم من زيورخ يحييكم

ازيكم يا بشر
ما قدرتش استنى لما ارجع
بصراحه اليلد هنا حلوه اوى
البلد دى اخضر بلد فى الدنيا
خضره فى كل مكان لدرجه ان الشوارع هنا ريحتها ورد من كتر الزرع




انا قاعد فى حته اسمها راينفيلدين
و ده الشارع اللى انا ساكن فيه

ودى الجيرل فرند بتاعتى

ايه رايكم ؟؟
بس مهما حصل حبيبه هتبقى احلى منها بكتير

اشوفكم على خير

اشوف وشكم بخير

انا مسافر سويسرا وراجع
حد عايز حاجه من العالم الاول
:)

استودعكم الله الذى لاتضيع ودائعه