كأبــــــــــه
الشارع في البلد دي
مليان حكايات كتير
مليان بناس بتشكي
وناس تحلم تطير
وناس تلاقيها واقفه
تتفرج عالحياه
وناس في الزحمه خايفه
وبتحلم بالنجاه
وناس بقلوبها شايفه
وعيونها مغمضين
وفي وسط الناس تلاقي
شاعر واقف حزين
بيدور عالحقيقه
في وشوش المطحونين
وبيسالهم سؤال
عن البخت اللي مال
وعن احوال بلدهم
وناسهم والعيال
وتبص الناس لحاله
وما تردش عليه
عبيط ده ولا ايه
الحال تعبان وظاهر
اكيد قدام عينيه
الناس بتدور تطوف
ماشيين ميات الوف
عايشين غربا في بلدهم
عايشين فيها ضيوف
نايمين قايمين في خوف
من بكره واللي جاي
واللي ماسكله طبله
واللي ماسكله ناي
ووشوش الناس بتحكي
في حكايه كل يوم
ضحكه وشوال هموم
وعتاب وجراح ولوم
سفر ودموع وداع
وشعورهم بالضياع
وحنين كتير كتير
لشعورهم بالامان
لشعورهم بالنجاح
لشعورهم بالبلد دي
ولفايده الكفاح
الناس بتموت خلاص
وبتكره الحياه
يبقي منين الفلاح؟
تبقي منين النجاه؟
تبقي ازاي الحياه؟؟