الكلمـــــــات

الدنيا كلام ... بنسمعه او بنقراه او بنشوفه او بنفكر فيه... بس فى النهايه مجرد كلام

Name:
Location: Cairo, Egypt

Thursday, March 16, 2006

نفســـــــــــــــى و نفســـــــــــــــى


نفسى ابقى غنى اوى
ونفسى ما يبقاش عندى فلوس كتير اقلق عليها
نفسى ابنى اللى جاى ده يبقى ولد عشان يقف جنبى وما ابقاش واقف لوحدى فى الدنيا
ونفسى يبقى بنت حنينه تدلعنى عشان اقدر استحمل واقدر اقف لوحدى فى الدنيا
نفسى مراتى تحبنى اوى قد ما باحبها
ونفسى ما احبهاش اوى كده عشان اعرف اتعامل معاها من غير ما ابالغ
نفسى اكتب تدوينه يعلق عليها الف واحد
ونفسى ما تهمنيش تعليقات اى حد
نفسى اسافر
ونفسى ما اسيبش مصر
نفسى اقدر اسامح ناس ظلمونى
ونفسى ربنا ما يسامحهمش
نفسى ما يبقاش نفسى فى حاجه
ونفسى افضل عايز حاجات وحاجات عشان يبقى عندى طموح
نفسى انجح فى حاجات كتير اوى باعملها
ونفسى ارضى باللى نجحت فيه لحد دلوقتى
نفسى اطير
ونفسى اقعد فى ركن جنب الحيط ما حدش واخد باله منى لحد ما اموت
نفسى اعيش الف سنه
ونفسى اموت شباب من غير عجز
نفسى اعيط
ونفسى اضحك

ونفسى اوى اوى

لما ما يبقاش فيه سبب للهم
افرح

10 Comments:

Blogger santakarim said...

nafsna m3ak wallahy:-)
simple.. touching ..

7:33 AM  
Blogger Yasser_best said...

تحياتي
كتاباتك لها مذاق مختلف
صادقة وبسيطة ومفيدة
أتابعك بإعجاب
أرجو أن تتاح لك فرصة زيارة مدونتي
http://yasser-best.blogspot.com/
محبتي

10:46 AM  
Blogger sarah said...

الدنيا امنيات ولو لم يكن هناك اماني لما صارت الدنيا حلوة
ربنا يحقق كل ماتتمنى

8:31 PM  
Blogger Ø²Ø¨Ø§Ø¯ÙŠ said...

نفسى اقدر اسامح ناس ظلمونى
ونفسى ربنا ما يسامحهمش
.....
بيني وبينك ساعات الواحد بيبقي نفسه في كدة
تحياتي للكلام الحلو

10:35 PM  
Blogger kalam said...

سانتا كريم:منور دايما يا امحتب

ياسر:اوعدك ازورك وشكرا على التعليق

ساره:ربنا يخليكى وشكرا على الدعوه اللى دعيتيها يا رب تتحقق :)

محمد:شكرا على تعليقك وعلى فكره انا باموت فى الزبادى من زمان

11:37 PM  
Blogger Doaa Samir said...

قدرت تقول اللي في نفسك ببساطة مؤثرة وصراحة نادرة.. وأقدر أقول لك إني حسيت أوي ببعض اللي نفسك فيه خصوصاً الأضداد..أو الحاجات اللي عكس بعضها في نفس الوقت..بس هي في الحقيقة مش متضادة
ميرسي لزيارتك لكرواني لأنها عرفتني عليك

2:29 AM  
Blogger kalam said...

ربنا يخليكى
انا بازور كروانك من فتره
منوره الكلمات

6:59 AM  
Blogger ماشى الطريق said...

أيه يا عم الصراحة دى
))))))))))))))

3:56 AM  
Blogger sonia said...

اقللك ايه بس انتا عملت حاجه صعبه اوى بمنتهى البساطه والصدق نفسى اعرف اعمل زيك كدا بجد برافو عليك

1:34 AM  
Blogger keemo said...

للأسف كلنا بناعنى من حالات التناقض دى ..لكن هل العيب فينا ولا فى الظروف المحيطة؟؟ يعنى برة مثلا ياريت حد يرد عليا فى النقطة دى ..أقصد فى الدول المتقدمة لما تكون كل حاجة مظبوطة الشباب بيحسوا بحالات التناقض دى؟؟
الحقيقة عن نفسى مفتكرش..شكرا يا
kalam
على كلماتك الرائعة

2:45 AM  

Post a Comment

<< Home