ورق قديـــــــــــــــم

ساعه الغروب
الليل بيجرى
زى ما يكون عزرائيل
داخل على شمس النهار
زى القدر
زى الخطر
زى عينين
طالع من حوافيها الشرر
قاعد انا جنب الجدار
قاعد حزين
بابكى على روح شمس النهار
خدها الملاك الاسود وطار
ورمى بسواد اللون على قلوب البشر
...........................
فى الليل تحيا قلوب
لكن كمان فيه قلوب تموت
وتتزاحم افكار عقل الزمان عايزه تفوت
عايزه تحقق حلمها
اه منها
شمس النهار كانت بتحلم
واهى طايره غارقه فى دمها
الليل هجم
ودبحها سكينه الغليظ
طارت لفوق
لفوق
وهوت فى قلب الارض زى اى طير غبى
هو خلاص جنس البشر
اصبح حجر
ولا الزمان ده محتاجلوه نبى
..........................
ركنت راسى عالجدار
وسرحت فى جمال الغيطان
قلت لنفسى ليه كده
كله سواد
هو انت من اتباع شيطان
لا والف لا
الا الشيطان
انا انسان
مليان حنان
باحزن لشكل الشمس
وهى بتندبح
واحزن لاجل الحب
لما ينجرح
واشعر بالف قيراط سواد
فى قلبى لما يتحداه زمان
ولما تتلم الظروف
اشعر بخوف
واشعر بقلبى بيتنفض طالب امان
القى ايدين الاهل جايه تضمنى
القى الوشوش الطيبه
القى قلوب بتحبنى
افرح واجرى
اجرى لحدود المكان
وازعق على الليل وانصحه
شمس النهار اللى دبحها
راجعه تفضحه
هتحط طمى على الجراح
شمس النهار خلاص هتبطل نواح
شمس النهار راجعه اكيد
رافعه سلاح
لما بيهل الصباح
وانا هنا
قاعد يا ليل
يالى تشبه عزرائيل
انا فى انتظار
جنب الجدار
لما بيهل النهار
لما هيهل النهار

من ورق قديم كتبته وانا مكتئب

ما اعرفــــــش ليه

ما اعرفش ليه بابقى خايف
ما اعرفش ليه بابقى حاسس بالسفر
ما اعرفش ليه كل ما ترمينى الحياه
القانى مستنى قمر
ما اعرفش ليه
ويمكن لوعرفت انا ما اعشقوش
دايما شايلى كلام
باشعر كانى ما قلتهوش
واقوله ليه

لمسه ايديك متغيره ما اعرفش ليه
نظره عنيك متحيره ما اعرفش ليه
حاسس بانك مش فاكرنى
تنكرنى ليه

فى الغالب هتعود
نفسى اشوفك راجع وفى ايدك زى زمان عود
هتعود بتغنى للبنت ام خدود تفاح
هتغنى للشمس اما تحنى شبابيك البيت
ايام ما عشقت وحبيت

ما اعرفش ليه بابقى خايف
ما اعرفش ليه بابقى حاسس بالسفر
ما اعرفش ليه كل ما ترمينى الحياه
القانى مستنى قمر
ما اعرفش ليه

اشعار : محمد ناصر
غناء : وجيه عزيز

نفســـــــــــــــى و نفســـــــــــــــى

نفسى ابقى غنى اوى
ونفسى ما يبقاش عندى فلوس كتير اقلق عليها
نفسى ابنى اللى جاى ده يبقى ولد عشان يقف جنبى وما ابقاش واقف لوحدى فى الدنيا
ونفسى يبقى بنت حنينه تدلعنى عشان اقدر استحمل واقدر اقف لوحدى فى الدنيا
نفسى مراتى تحبنى اوى قد ما باحبها
ونفسى ما احبهاش اوى كده عشان اعرف اتعامل معاها من غير ما ابالغ
نفسى اكتب تدوينه يعلق عليها الف واحد
ونفسى ما تهمنيش تعليقات اى حد
نفسى اسافر
ونفسى ما اسيبش مصر
نفسى اقدر اسامح ناس ظلمونى
ونفسى ربنا ما يسامحهمش
نفسى ما يبقاش نفسى فى حاجه
ونفسى افضل عايز حاجات وحاجات عشان يبقى عندى طموح
نفسى انجح فى حاجات كتير اوى باعملها
ونفسى ارضى باللى نجحت فيه لحد دلوقتى
نفسى اطير
ونفسى اقعد فى ركن جنب الحيط ما حدش واخد باله منى لحد ما اموت
نفسى اعيش الف سنه
ونفسى اموت شباب من غير عجز
نفسى اعيط
ونفسى اضحك

ونفسى اوى اوى

لما ما يبقاش فيه سبب للهم
افرح

بيــــــــــــــــــــــــــــــــبه

......اشاهد فيلم عرق البلح للمره الأولى
ذكريات كثيره تعود
معظمها لم اعشه بنفسى
ولكنى نشأت مع حكاياته
......الصعيد
جدتى سوهاجيه لم تفلح الحياه فى وجه بحرى قرابه الخمسه والعشرين عاما ان تنسيها لهجتها ولا احزانها
حيث السمه العامه دائما فى اهل قبلى هى الحزن
حتى انهم يتكلمون عن الصعيد على انه شخص حى يفتقدونه
وكانهم من نسله
اذكر انى كنت احتفظ بدفتر كنت اكتب فيه كل ما يقطر من فمها
فهى باستمراربحر لا ينتهى من القصص والاغانى الحزينه

......بيــــــبه
جابلى الطبق
......بيــــــبه
مليان نبق
......بيــــــبه
قالى كلى
......بيــــــبه
قلت ما اكلش
......بيــــــبه
وديه لامك
......بيــــــبه
امى بعيد
......بيــــــبه
اخر الصعيد
......بيــــــبه
والصعيد مات
......بيــــــبه
خلف بنات
......بيــــــبه
......بيــــــبه

كتبها عبد الرحمن الابنودى نقلا عن والدته فاطنه بقنديل
وسمعتها من الجده منذ سنوات عده

ما احناش كارهينك ....... لكن هارشينك

مبروك يا عريسنا
يا أبو شنه ورنه
يا واخدنا وراثه

أطلب واتمنى
وأخرج من جنه
أدخل على جنه

مش فارقة معانا
ولا هارية بدنا
ولا تاعبه قلوبنا
ولا فاقعة بيضاننا

يا عريس الدولة
أفرح وأتهنى
ما أحناش كارهينك
لكن هارشينك
ح تكمل دينك
وتطلع دينا

بقلم : أحمد فؤاد نجم
بمناسبه خطوبه عريس الدوله