نفسنـــــــــــــــــــــه
يا قلبي ليه مستحي تبكي
ولا البكا اصبح خلاص ممنوع
الدمع هو الدوا يا قلبي يا موجوع
الدمع احسن مالكلام
يا سكه يا ماشيه بلا اقدام
يا سكه مالها هدف
يا سكه مالها رجوع
يا سكه والرايح يقول للجاي
ارجع قوام يا جدع
بس الرجوع ازاي
والناس يا ماسكه عصا
يا ماسكه طبله وناي
الدنيا ضلمه
كئيبه
باحلم بطاقه نور
واشم مره الهوا
واقطف بايدي زهور
وافرد ايديا واصيح
واجري وانط السور
محشور انا ما بين النفس والدنيا
با حلم الاقي سكه الفرحه
باجري يمين وشمال
واطلع وانزل واتدبرالاحوال
واجيبلي حبه بنون
واكنزلي حبه مال
وافضل انا محشور
مستني طاقه نور
ما بين النفس والدنيا
posted by kalam | 6:44 AM
5 Comments:
اليأس اللي في كلامك نفس اليأس اللي عندي وعند ناس كتيير نظرا لأن الظرف اللي عايشين فيه بيحكم علينا بيه انا كنت قررت اعتزل لكن عدت تاني للحياة عارف ليه؟
لأني فكرت ان الرسول صلى الله عليه وسلم كان لوحده وعمل امة عظيمة فما بالك واحنا كتيير بس متفككين انا عندي امل نتوحد ونرجع البسمة تاني لزماننا
يا قلبي ليه مستحي تبكي
ولا البكا اصبح خلاص ممنوع
الدمع هو الدوا يا قلبي يا موجوع
جميله
:)
ممتاز جدا بس الواحد لازم أكيد ياخد بلأسباب وبعدين يسيب الباقى على ربنا
نهر الحياة
سعدت بالمرور على مدونتك
اعجبتني كلماتك واحساسك بالحزن الذي يختفي باعماقها
اتمنى لك التوفيق
الله معك
بصراحه عجبكني شعرك جدا
واجمل حاجه فيه انه محافظ علي القافيه والوزن مظبوط .. لان انا قريت مدونات كتير كان بيبقي الخيال كويس بس الاوزان بايظه لكن بجد شغلك زي شغل المحترفين
انا لسه جديد في عالم المدونات اتمني أنك تزور مدونتي وتقولي رايك
Post a Comment
<< Home