الكلمـــــــات

الدنيا كلام ... بنسمعه او بنقراه او بنشوفه او بنفكر فيه... بس فى النهايه مجرد كلام

Name:
Location: Cairo, Egypt

Sunday, August 13, 2006

تـــــــــــــــــــــاج

اول مره يتعملي تاج
يتعملي مرتين
المدون لما يسعد بقي
حلم وزبادي عايزيني اجاوب علي الاسئله دي

يا هادي

هل أنت راض عن مدونتك شكلاً وموضوعاً؟
لا خالص

ـــ هل تعلم أسرتك الصغيرة بأمر مدونتك؟
الصراحه مراتي بس اللي تعرف

ـــ هل تجد حرجاً فى أن تُخبر صديقاً عن مدونتك؟
مش حرج بس قيد
يعني بعد كده هابقي باكتب وهو في دماغي
وبعدين انا مش كاتب
انا بافضفض هنا وبس
عشان كده احب ابقي حر
انا قلت لمراتي بس عشان ما يبقاش بينا اسرار

هل تعتبرها أمرا خاصا بك؟
بالظبط
هو ده

ـــ هل تسببت المدونات بتغيير إيجابى لأفكارك؟
طبعا

اعطنى مثال فى حالة الاجابة نعم
التدوين نفسه غير فيا حاجات كتير
يعني بقيت بافكر واحلل كل حاجه باشوفها عشان الاقي التدوينه الجديده
ده غير المشاكل السياسيه والاجتماعيه اللي بقيت غصب عني مهموم بيها اكتر من الاول

ـــ هل تكتفى بفتح صفحات من يعقبون بردود فى مدونتك أم تسعى لاكتشاف المزيد؟
ساعات وساعات
بس بافرح اوي لما الاقي مدونه حلوه عشان ده معناه مكان جديد يستاهل الزياره

ـــ ماذا يعنى لك عداد الزوار.. هل تهتم بوضعه فى مدونتك؟
زي ارقام التوزيع بالنسبه للصحفي
بصراحه شويه شويه بدات احس اني باكتب عشان العداد ده يزيد

ـــ هل حاولت تخيل شكل اصدقائك المدونين؟
يمكن بس مش كلهم

اعترفـــ هل ترى فائدة حقيقية للتدوين؟
والله هو مكان هايل للفضفضه وتسجيل لحظات مهمه في حياه المدون
ده غير التواصل مع ناس انت عارف انهم ليهم فكر
ناس دماغ يعني

ـــ هل تشعر أن مجتمع المدونين مجتمع منفصل عن العالم المحيط بك أم متفاعل مع احداثه؟
اطلاقا
المدونين هما المصريين بانواعهم
الطالب والمهندس والدكتور و المسلم والمسيحي

ـــ هل يزعجك وجود نقد بمدونتك ؟ أم تشعر انه ظاهرة صحية؟
ما حصلش قبل كده
بس انا عموما باتخنق لما حد بينقدني
لكن لما اعد مع نفسي بعدها
امخمخ واستفيد

ـــ هل تخاف من بعض المدونات السياسية وتتحاشاها؟ هل صدمك اعتقال بعض المدونين؟
مش باخاف منها
بس مش باخشها بانتظام
عموما انا باحب المدونات الادبيه والشخصيه اكتر
بيبقوا ادفي
واعتقال المدونين ما صدمنيش قد ما حسسني ان النظام بدأ يتغير ويخاف بعد ما كان بيسيب الناس زمان تهاتي مع نفسها

ـــ هل فكرت فى مصير مدونتك حال وفاتك؟
اهي هتفضل متلقحه للذكري
وبعدين مش هابقي فاضيلها ساعتها

ـــ آخر سؤال : تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك؟
قول معايا قول بجد
وجيه عزيز

ـــ اكتب اسماء خمسة مدونين ليقوموا بهذا الاستقصاء بعدك
سانتا كريم - حدوته لو بتيجي هنا اساسا - سهروردي - انتوك - نعناعه

9 Comments:

Blogger ادم المصري said...

حلو ... بداية تعارف جيده

10:23 AM  
Blogger حــلم said...

كلام
اولا شكرا لانك لبيت الدعوة
وبعد كدة
انت مدونتك حلوة شكلا وموضوعا
يعنى لو مش راضى عن شكلا فدة ارق شكل ممكن حد يختاره
كان اختيارى الاول

وقابل للتغيير فيه بسهولة جدا

صراحتك مع نفسك شديدة جدا حتى فى موضوع عداد الزوار
كتير بيتحاشوا الحقيقة

رأيك فى المدونات الادبية والشخصية رائع
لان كتير برضه بيدّعوا انهم امخاخ
ويدلوا بدلوهم فى السياسة بجهل واضح

تحياتى لك

ودمت فى تألق

11:27 AM  
Blogger santakarim said...

ya a7'y aktr 7aga batr7ny fi alblog da, albsata, we an mafesh fazlka, we ank wa7'd ra7tk keda man 3'air tamseel, ana sa7ee7 mosh ba3;a2 kteer, bas bagy are7 hana :-)
t7yaty , we altag fi altaree2 ya man :-)

1:20 PM  
Blogger Lasto-adri *Blue* said...

احم احم يا استاذ
نحن الموقع اعلاه المدعوة لست ادرى الشهيرة ببلو على سن ورمح قد حولنالك نفس الاستقصاء ولكن فى موعد بعده بكام يوم.. نظرا لظروف البريد الصادر والوارد للسفر خارج حدود البيت

عموما.. اجباتك فى السريع كدة يا كلام... امال فين الشعر.. كنت احبها تطول
:P
بس لذيذة لسا


بصراحه شويه شويه بدات احس اني باكتب عشان العداد ده يزي

تصدق انه بجد.. وفعلا وبحق وحقيقى

عند هنا نختتم المذكرة الموجهة اليكم
سلام

3:17 PM  
Blogger kalam said...

ادم المصري : اتمني

حلم : ربنا يخليك انا باقول ان شكلها مش عاجبني عشان انا عارف انه ممكن يبقي احسن من كده
انا صحيح مش مصمم مواقع بس ده برضه يعتبر كاري
:)

سانتا كريم : ربنا يخليك يا امحتب
انا مبسوط انك بتستريح عندي

العزيزه اوي لست ادري : انا اسف والغلط راكبني اني ما شفتش التاج
بس بصراحه انتي بتكتبي بسرعه
وغالبا انا مش بالحق اقري غير اخر بوست انتي كتبتيه
معلش عندي دي
:)

12:14 AM  
Blogger حـدوتـة said...

ميرسي يا أحمد على التدبيسة :) لسه في الطابور في تدبيستين ما ردتش عليهم وزمان أصحابهم قطعوا علاقتهم بيا :) صدقني أوي ما أكون في مزاج يسمح بالإجابة على الأسئلة هاجاوبك على طول :)

يومك جميل :)

1:04 AM  
Blogger karakib said...

شكرا لانك مررت ليا الدور دلوقتي بقي عليا اجاوب بجد لانه ناس كتير اوي بعتولي نفس التاج ده ...
متشكر يا احمد بجد
و انتظر اني انزله في القريب جدا
انتوك

4:35 AM  
Blogger سندباد مصري said...

اكتر حاجه عجبتني في الا جابات

الأغنيه بتاعه وجيه عزيز

انت اكيد حد فنان

ومتقلقش علي مدونتك حال وفاتك اكيد الورثه هيهتموا بالموضوع

والسلام

2:51 AM  
Blogger مأمون المغازي said...

أهلاً أبو الكلمات

أعجبتني ردودك على الأسئلة

واقعيتك وبساطتك أعجبتني

تحياتي

4:14 AM  

Post a Comment

<< Home