الست حبيبـــــــــــــه

31 اغسطس 2006
يوم من احلي واصعب الايام في حياتي
بدأ باتصال الساعه واحده بعد نص الليل بيقولي النهارده هو اليوم
الساعه 3 كنت في المنصوره وما حدش يسالني ازاي
دخلت العياده باجري
كانت بتتوجع وبتصرخ جامد
اتعذبت اوي
عدت بكل الام الولاده الطبيعيه وفي النهايه الدكتوره اضطرت برضه تولدها قيصري
انا كنت حاسس بعجز مش عادي
بتتوجع قدامي ومش قادر اساعدها
ما قدرتش اعملها حاجه غير اني اعيط وادعيلها
شكلي كان تحفه وانا شحط طوله مترين وعمال يعيط والموجودين عمالين يطبطوا عليا
بس مع اول الله اكبر في اذان الفجر سمعت صوتها بيوأوأ
خرجوهالنا قبل مامتها
اذنتلها في ودنها وحنكتها بتمر واديتها للموجودين
كان لازم اطمن عليها هيا الاول قبل ما افوق للبنت
ما كنتش قادر امسك نفسي من الدموع بعد ما خرجت تايهه من البنج
حلفتلها وحياه حبيبه
ما نخلف تاني الا اذا هي اللي طلبت
ما فيش حاجه في الدنيا تساوي العذاب اللي شافته
بس تعرفوا انا كنت غلطان
لما البت المفعوصه ابتسمت بس
اكتشفنا انا وهي ان فيه حاجات تستاهل اي عذاب
ربنا ما يحرم حد من النعمه دي
وعقبي لكم جميعا