الكلمـــــــات

الدنيا كلام ... بنسمعه او بنقراه او بنشوفه او بنفكر فيه... بس فى النهايه مجرد كلام

Name:
Location: Cairo, Egypt

Tuesday, October 31, 2006

عتـــــــــــاب


لما تحب تسلم
او تتكلم
انا موجود
لما تكون مجروح مالدنيا
قرب ليا
اسكن فيا
ارمي هموم الجرح عليا
اصل يا صاحبي الدنيا ساعات
تدي حاجات
بالميات
بس وقد الدنيا ما تدي
تقولك هات
لازم تاخد
اصل الواحد من غير صاحب
يفضل واحد
واحنا يا صاحبي بقينا اتنين
يمكن ايوه مش كاملين
بس اتنين
ما احناش واحد

لما تحب تسلم
او تتكلم
انا موجود
نفس الصاحب
نفس سمار اللون الشاحب
نفس النمره والعنوان
ما تبقي تعدي؟؟
نقعد عندي زي زمان
فاكر الشاي؟؟
لسه الوالده بتعمل شاي
بس تعالي
بلاش تتعالي
مر عليا
ونشرب شاي

12 Comments:

Blogger santakarim said...

نفس الصاحب
نفس سمار اللون الشاحب
نفس النمره والعنوان
ما تبقي تعدي؟؟
نقعد عندي زي زمان
فاكر الشاي؟؟
لسه الوالده بتعمل شاي
بس تعالي
بلاش تتعالي
مر عليا
ونشرب شاي


3agbtny awy, alregala batat7'tf ya 3am wa7ed wara altany, hanshrb shai ma3 meen b2a, aly safer we aly mrato 7absah .. yla , wenta kman mab2tsh ta3dy leh ya 3am kalam...mat3dy.. man 3'air shai...

3:05 AM  
Blogger karakib said...

اخيرا رجعت :) تدويناتك العذبه الراقيه وحشتني يا عم انت ايه الغيبه الطويله دي ؟؟ حبيبه خدتك مننا و لا ايه يا ابو حبيبه !!
ايه اخبارها صحيح ؟؟
لعلك بخير انت والاسره كلها
تدوينتك دي بتفكرني بكتاب كامل لكاتبي المفضل دائما عبد الوهاب مطاوع رحمه الله عليه ... بيتكلم عن مفهوم الصداقه و العلاقه الانسانيه العميقه اللي فيها
اسمه صديقي ما اعظمك
و في احد السيناريوهات لمسلسل قديم لا اتذكر اسمه البطل مره من المرات طلب لما يموت و ينزلوا له نعي يكتبوا فيه اسماء اصدقائه لانهم هم قرايبه اللي اختارهم طوال حياته ...
طبعا الفكره خياليه قليلا لكنها عجبتني اوي ...
انتوك

3:47 AM  
Blogger kalam said...

ازيكوا يا جماعه واحشني والله
اسف علي الغيبه دي
بس حاله فتور كده ماسكاني اليومين دول
والله حتي شغلي مقصر فيه
بس معلش
كله بيعدي

5:33 AM  
Blogger ... said...

حمدالله على السلامة
نورت يا ابو بيبو
:)

لى سؤال
هو فيه كدة؟

يعنى ممكن حد يكتب كدة بالسلاسة دى وبالعمق دة وبالرقة دى

بجد اهنيك

واهنى الناس اللى بيعدوا يشربوا شاى عندك.. عليك

كل سنةوانت طيب وعيد سعيد لك وللاسرة كلها

7:20 AM  
Blogger sarah la tulipe rose said...

يا سلام بجد دة الكلام الي يقوله عليه السهل الممتنع

وجود الصديق فعلا ليعوض باي شيء في العالم
ساعات لو غابوا يوم واحد بنبقي حاسين دايما بحاجة ناقصة
الف مبروك علي حبيبة معلش متأخرة موت بس انا اول مرة اجي المدونة

8:28 AM  
Blogger Elmesaharati said...

ALLAH 3leek
InshALLAh Lama Agi Masr aheb at3raf 3leek we neshrab Shaa-y

10:33 AM  
Blogger السهروردى said...

كلام باشا
العود أحمد
بقالى كتير بجد مستنى حاجه زى كده
القصيدة جميله
ورجوعك للتدوين أجمل

حمد الله على سلامتك
:)

11:05 AM  
Blogger ماشى الطريق said...

والله فى الأول يا عم كلام
سامحنى يعنى كنت فاكرها بتاعت حد تانى
سامحنى يعنى أصلها عجبتنى أوى
عوداً أحمد

11:50 AM  
Blogger kalam said...

حلم : علي فكره عشان تحسي بساطه ورقه الكلام لازم انتي كمان تكوني بسيطه ورقيقه
شكرا علي كلامك وسؤالك وانا غايب


ساره : الله يبارك فيكي
انا مبسوط اني كتبت حاجه عجبتك


المسحراتي : ترجع بالسلامه ان شاء الله


سهروردي : منور يا حسين
واحشني يا ابو سيف خشب


ماشي الطريق : ماشي يا دكتور
هنعديها
انا مبسوط والله انها عجبتك انت بالذات

1:44 AM  
Blogger حنيــــــن said...

الله على الجمال

انا حسيتها احنا

مصريه اوى وعشريه اوى وحميمه كمان

ما تبقي تعدي؟؟
نقعد عندي زي زمان
فاكر الشاي؟؟
لسه الوالده بتعمل شاي
بس تعالى

لمستنى اوى " لسه الوالده بتعمل شاى"
اد ايه فيها تقارب ودفئ

مش اى حد بيدخل بيتك ويعدى عليك من زمان

استمتعت بكلماتك اوى

3:23 PM  
Blogger hebaz said...

ما تبقي تعدي؟؟
نقعد عندي زي زمان
فاكر الشاي؟؟
لسه الوالده بتعمل شاي
بس تعالي
بلاش تتعالي
مر عليا
i was so much affected by that part,ياه أيام و زكريات و حكايات و حيه مملوئه بالناس و الأصدقاء باقى منهم دلوقتو ى بس الذكريات و التليفونات
لسه الوالده بتعمل شاى....مشاركة كل تفاصيل الحياه فين أيام ما كنا صغار و بنقعد مع أصحابنا و أهالينا الكبار و ماما تعمل الشاى و نذاكر سوا و أهالينا يدعوا لنا كلنا ياااااااه
قلبت عليا ذكريات جميلة كثيرة بس عارف فى أظلم اللحظات بقول لنفسى و بشكر ربى أنه أنعم عليا بأحلا اللحظات و أنى عندى أجمل الزكريات
صحصح حبيبه أزيها؟

2:10 PM  
Blogger big big girl...in a big big world said...

كلام جمييييل

4:54 AM  

Post a Comment

<< Home