الكلمـــــــات

الدنيا كلام ... بنسمعه او بنقراه او بنشوفه او بنفكر فيه... بس فى النهايه مجرد كلام

Name:
Location: Cairo, Egypt

Thursday, May 04, 2006

لو اصبحت رئيــــــــــــــــــــــس


خلصت الانتخابات الاولى - اللى فاتت كانت هجص- واصبحت اول رئيس منتخب - بحق ربنا- لجمهوريه مصر العربيه
يا ترى ايه اللى هيحصل
بعد الاحتفالات والذى منه
ودبح خروفين او عجل حسب التساهيل
عشان الغلابه يفرحوا وياكلوا ويدعولى
ادخل غرفه اداره الامور - مش عارف بالظبط اسمها ايه- والاقى خير اللهم اجعله خير
اطنان من الورق فى انتظار الرئيس البطل ,العظيم ,المنتخب,الامل
عجز موازنه
على شئون احزاب
على حزب حاكم وحكومه المفروض تتكون
واكتشفت كمان ان النظام القديم فعلا كان فيه كل العيوب اللى انا فضحتها فى حملتى الانتخابيه
لكن برضه معظم المشاكل اللى اتكلم عليها حقيقيه
طب اتعامل ازاى مع المشاكل دى
انا زمان كان عندى فكره وكنت مقتنع انها سليمه
ان الاصلاح هيبتدى فى 3 اماكن
الازهر
المؤسسه الدينيه الحقيقيه اللى اتهمشت بفعل فاعل
واللى باصلاحها وتحريرها من القيود هتقضى على اى تطرف دينى حتى عند المسيحين
التعليم
الحاجه الوحيده اللى ممكن تقلب الانفجار السكانى من نقمه الى نعمه وبرضه الحاجه الوحيده اللى ممكن تحول الاقتصاد المصرى الى اقتصاد بالمعنى الصحيح
تداول السلطه
وده بقى محتاج تنضيف ورش مبيدات عشان الواغش يموت من اول المحليات الى رئاسه الجمهوريه نفسها

بس اللى حاسه دلوقتى ان الموضوع مش سهل
وكل ده مش كفايه
لازم يبقى عندى حاجه ارجعلها لما احتار
فكرت فى تجارب الدول التانيه
بس اكتشفت ان زى النظام القديم ما كان بيقول
تجارب المجتمع الدولى مش هتنفع هنا
بس مش عشان المصريين لسه بيرضعوا
ومحتاجين اللى يسوقهم ويفهمهم الصح من الغلط
ولا عشان الفكره القديمه ان الناس دى فراعنه ولازم يمشوا بالكرباج والا هيبلطجوا والدوله تنهار
بس عشان فعلا مصر والمصريين ليهم خصوصيه شديده
من وضع عربى وشرق اوسطى معقد جدا
تقريبا كده زى ما يكون عشره واقفين كل واحد واقف على رجل اللى جنبه
لو واحد شال رجله تبقى مصيبه
الى وضع دولى متنيل بنيله
مليان اشى معونات من اكتر من 80 جهه مانحه
الى معاهدات سلام وتطبيع مع الاعداء الطبيعين
الى مشاكل داخليه من اقباط على بدو سينا على بنيه اساسيه مش موجوده اساسا

يبقى ايه الحل
اروح لمين لما احب اخدم شعب مصر
قطعا مش هاتصل ب 140 دليل

ولقيت تفكيرى بياخدنى للاسلام كمرجعيه
سمعت زمان انهم عملوا استفتاء ان الاسلام يبقى هو اساس الحكم
وسمعت كمان ان الناس كلها وافقت حتى الاقباط
بس الحكومه وقتها كل اللى عملته انها خلت الشريعه الاسلاميه هى المصدر الاول للتشريع
الاول
مش الوحيد

بس انا خايف من موضوع مرجعيه الاسلام دى
هيقولوا اخوانى
وهيقولوا كلام كتير عن مشاكل الدوله الدينيه
والتجارب الايرانيه والطالبانبه
بس افتكرت كلام عمر بن الخطاب لما قال
"نحن قوم اعزنا الله بالاسلام فان طلبنا العزه فى غيره اذلنا الله"

بقى انا هاكذب عمر بن الخطاب واصدق الجماعه بتوع التجارب البدنجانيه دول
وسحبت اول ورقه
وهزيت القلم الجاف جامد عشان ما يشحرش
وكتبت

"بسم الله الرحمن الرحيم"

6 Comments:

Blogger Yasser_best said...

مشروع متكامل للإصلاح خاصة البدء الأزهر والنظام التعليمي
لا يوجد إصلاح من القمة.. فالأساس هو إنشاء قاعدة شعبية سليمة تدعم وتصون القيم والمباديء والأفكار التي يقوم عليها أي مشروع للدولة
الخوف.. كل الخوف.. من سوس الفساد الذي أنشأ مؤسساته الخاصة التي ترعى وتدافع عن مصالحها على حساب الوطن
رؤية جميلة وشاملة

10:22 AM  
Blogger Doaa Samir said...

أنا مش هاعلق لا على البنية التحتية ولا الفوقية ولا الفساد ولا الإصلاح الزراعي والاقتصادي وغيره
هاقول "الله عليك" وبس
لو كده، يبقى خدني عندك وزيرة للتعليم والبيئة وكمان المواصلات لو أمكن وممكن مستشارة في وزارة الإسكان والتعمير... هابدأ زيك بـ"بسم الله" بجد وشوف مصر هتبقى مصر ازاي؟!! بس مش هاوعد وأقول في غمضة عين.. هياخد مني وقت شوية

حلو أوي حديث النفس ده.. بيدور في خلدي ساعات وبينتهي بالفوقان والضحك من شدة الأسى
عجبي

2:36 PM  
Blogger kalam said...

ياسر : الفساد بقى هو الاساس يا ياسر
حاسس ان غير المفسد بقى ضيف والمفسد هو صاحب البيت والشركه والبلد بحالها

دعاء : اكيد كلنا سالنا نفسنا لو بقيت رئيس هاعمل ايه
كمان سالنا نفسنا احنا مقومين الدنيا عشان يجى حد تانى غير مبارك
طب اللى هييجى ده ان جه فعلا هيعمل ايه
عموما اكتبى لسته بالوزارات اللى عاجباكى وابعتيلى السى فى بتاعك

11:26 PM  
Blogger karakib said...

عايز ابقي وزير الثقافه ...
ينفع؟؟
انتوك

5:57 AM  
Blogger ihab said...

شكرا على تعليقك على حكاية نوال السعدواى لكن يجب ان نرد و لا تخشى على من ارتفاع ضغط الدم فقد تعلمنا البرود عشان مانموتش و نسيب ليهم البلد

11:21 AM  
Anonymous Anonymous said...

This is very interesting site... City liposuction new york Car theft insurance policies motorala ring tones Pay marketing strategy per click promotion ppc http://www.percocet-10-325.info/miele-vacuum-cleaner.html Www.infocom mp3 players Hair loss man uk free tranny pics.com chevrolet truck shop manuals Online pharmacy valium in fioricet Pilates athletes Nissan north wilkesboro 1985 chevrolet c20 pickup 1 ton fleetside lwb Medical malpractice attorney twentynine palms callwave answering service Water bed comforters Causes for blood pressure spikes rhode island saints youth hockey brother fax 190 owner manual

1:31 AM  

Post a Comment

<< Home