الحقيــــــــــــقه
بعد ان شاهدت القاضى- رئيس المحكمه- بالامس فى برنامج وائل الابراشى على قناه دريم
وهو يشرح كيف تم الاعتداء عليه من قبل ضباط الامن
وبعد ان تخيلت نفسى وانا امر فى شارع عبد الخالق ثروت بالصدفه
انا المراقب السلبى الذى لم يخرج فى مظاهره فى حياته
وفى نفس الوقت لا يملك اى ضهر يحميه
-هو فيه ضهر اكبر من رئيس محكمه؟-
وبعد مراجعه كل الاحتمالات الممكنه والاصابات المتوقعه
اعتقد ان قرار السفر ليس ترفا كما كنت اظن
posted by kalam | 11:54 PM
12 Comments:
ديقي العزيز للاسف كنت قاعد بتفرج عالبرنامج بتاع وائل الابراشي و حاولت ان اتخيل بعد ثلاث اشهر ما سيحدث ... هو كان مستضيف طلعت السادات و اتنين قضاه
بعد كام شهر هتشوف طلعت الساات هيحصل له ايه ... و هتشوف القاضي الشريف ده هيروح فين و هتشوف برضه وائل الابراشي هذا الذي يمتلك جرأه غريبه هيكون مصيره ايه ...
خد بالك مافيش حاجه في مصر اسمها ضهر و لا ضهر و لا بطن و لا رجل ... في حاجه واحده بس ... كلنا عارفينها الجزمه ..
اما عن الهجره فهي حل ليس بالسييء فالنمور في سيبريا لم تعد تستطيع الحياه و الثدييات كثيره تهاجر عندما لا تجد الفرص الكافيه للحياه في البيئه التي ولدت فيها فيكون امامها حل من اتنين الهجره او الانقراض ... دي نظريه انتوك الاولي :) الحل في الهجره او الانقراض الا تلاحظ معي بدايات انقراض المفكرين الحقيقيين في بلدنا ...
ربنا يستر عالبلد يا راجل ده بقت حاجه صعبه اوي
الاستاذ طلعت السادات اتكلم عن الدين الداخلي يا صاحبي و انه وصل ل600 مليار !!!
محدش واخد باله الكلام ده معناه ايه ؟
انتوك
مش عارف يا هانى
والله العظيم انا مهزوز اوى اليومين دول
ومش عارف الصح فين
انا عايز اعيش فى مكان محترم واربى ابنى فى مكان محترم
وباحب البلد دى بجنون
وفى نفس الوقت انا دلوقتى اقدر اسيب مصر فى اى وقت
ويمكن ده ما يبقاش سهل كده قدام
مش عارف
سوف اوجه خطابى اولا الى انتوك يعجبنى فيك التفكير المتزن ورقة الاحساس وحبك لمصر وتحليك بالادب الدال على حسن الخلق تعليقك على شفرة دافينشى رغم ان الفيلم يتعرض لعقيدك ومن قبل تعليقك فى مدونتى على النقاب كان السبب فى ردى عليك هنا ـ بحكم وجودى فى تكساس وهى المعروفة فى امريكا انهااهم ولاية فى الولايات المعروفة بولايات حزام الانجيل اى من الولايات المتدينة جدا جدا ورغم هذا فان فيلم شفرة دافينشى يعرض هنا وفى مدينتى الصغيرة فى قاعتين للسينما والاقبال على الفيلم شديد جدا خاصة من الكبار وقد ناقشت الفيلم مع زميل متدين جدا وكانت وجة نظره ان الفيلم مجرد قصة زى اى قصة بناء درامى افتراضى ـ لم اسمع عن خروج مظاهرات ضد الفيلم ـ وما اسهل هذا هنا ـ ومعلقى القنوات التليفزيونية هنا علقوا على الفيلم وذهبوا الى الكنائس التى تعرض لها الفيلم وعرضت الكنيسة وجهة نظرها وكل شئ تم بدون تشنج وهذا ما لا نعرفه ولهذا ارتقوا اما نحن فالنقاش عندنا زى نقاش الاتجاة المعاكس على قناة الجزيرة زعيق ومحدش بيسمع حد وكان الاعلى صوتا هو الاقوى حجة لك احترامى ياانتوك او ياهانى اذا كان هذا هو اسمك
بالنسبة لكلام ـ كتبت تقول ـ اعتقد ان قرار السفر ليس ترفا كما كنت اظن ـ وانا انصحك اذا كان لديك فرصة للهجرة لاتنتظر لان دول الهجرة التقلدية الان بتقفل على الاجانب عامة المهم متروحش لبلاد الجاز المتخصصة فى زل المصريين لان الزل هناك مضاعف ومتعمد للمصريين وسيبك من الشعرات بتعتهم
اعتقد انى مش حكتب تانى على مدونتى لان المدونات الاخرى تفى بذلك واذا اراد حد منكم المتابعة معى يبقى البريد الاليكترونى احسن شئ وهو على مدونتى وهو
proud92@yahoo.com
كلام
قرأت كلامك... وشبه حصلى نفس اللى حصلك لما شفت القاضى بيحكى على دريم
شئ اقل ما يقال عنه مهين.. تحس فعلا انك فى غربة عن بلدك.. فى غربة عن ناسك
نفسك تعمل وتعمل بس مش قادر
لكنى بعتب عليك.. الهجرة مش دايما هى الحل.. الهجرة هروب
انت عارف حاجة... والدى مش متعصب سياسيا.. او ممكن تقول عليه من الناس اللى بيقرؤا السياسة من باب العلم بالشئ..
لو آراء ساعات.. لكن فى أغلب الأوقات دايما بيمشى جانب الحيط -زى ما تقدر تقول-
انما بقى له فترة مهتم باللى بيحصل فى البلد بشكل عجييييب.. تلاقيه دايما بيدور... عايز يعرف.. والفكرة ان باب مش لوحده
واللى بيبدأ النهاردة بالمعرفة .. بكرة بالفعل
خلاصة القول.. انه دلوقتى ما ينفعش نسيب المكان.. ولا ينفع نفضل زى التور فى الساقية بغمامة على عيونا.. عشان هى بقت ساحة حرب
فعلا هى حرب ولازم ندخلها.. شئنا او لم نشاء.. النهاردة بكرة.. بعد سنة او سنين
لكن ما ينفعش نتراجع ونقول ح نمشى من هنا
كلامى مش مرتب -اعذرنى- بس لانى لسا سامعة نفس الكلام من اعز اصدقائى.. وهو كمان ناوى يهاجر .. رغم وطنيته
بس حستها ضعف وانهزام...
لو اننا فعلا بنحبها.. ما ينفعش نسبها لوحدها
جدو : شكرا على تعليقك
بس ليه هتبطل تكتب ؟
انا مش هاقلك لازم تكتب
بس لما تلاقى حاجه عايز تقولها قولها قولها
بس
لست ادرى : انا على فكره عشت اوقات كان السفر فيها ضروره بالنسبه لى بس ما قدرتش
بس انا باوصف احساس بالياس وفقدان الامل ان احنا هنشوف البلد دى اللى نايمه فى العسل والفساد بتصحى
احنا بنحب مصر اوى اوى
بس عمرى ما حسيت انها بتحبنا
جدو كلامك وسام علي صدري اعتز به جدا
اما عن توقفك عن الكتابه فده شيء سييء جدا و ارجو انك تكمل كتابه لو سمحت ...
انتوك
7abet as2al lasto-adri, hoa a7na ban3mal le masr aih be a3dtna ya3ny ?!!!!!!
kalam:
azon an alsafr 7asba sha7'sya gedan ma7dsh ya2der yafidk fiha, bas blash ta7sbha 7asba 3atfyah ..
we ba3den fain al mails ya 3am, ana raded 3alik man sat oshohor :-)
7abet as2al lasto-adri, hoa a7na ban3mal le masr aih be a3dtna ya3ny ?!!!!!!
ح قول لك يا كريم
فى قسمنا العزيز بالكلية.. المفروض فى 35 دكتور مسجلين.. اللى موجودين فى مصر 15.. معظمهم على المعاش
والباقى اغلبهم فى أمريكا او ألمانيا
هو حقهم يسافروا برة ويكونوا حياة افضل لنفسهم.. الكلية فى الأول و فى الآخر بتدى كام للموظف هنا..
بس تيجى بعدها يا كريم تلاقى ان احنا.. الجيل الجديد مظلومين.. مفيش حد يعلمنا صح
طلعين.. والله العظيم لا نفقه شئ
ح تقول لى دة مثال خاص.. ما يجوزشى نعممه.. اقول لك.. لاء
لازم نعممه
دلوقتى المدرس راح يسيب مكانه ف البلد... وراه اجيال بتضيع
بعده المحاسب الشريف يسيب البلد... الشريكات ح تتسرق اكتر ما هى مسروقة
بعده.. بعده القاضى راح يهاجر.. والمظاليم مايلاقوا حد حتى يواسيهم فى همهم
ساعات كتير بفكر.. وايه اللى يجبر معيد فى الكلية يكمل وهو آخره بياخد 125 فى الشهر.. وقدامه بيروقراطية مالهاش حل.. ونظام يسد نفس اللى خلفوه
لكن دكتور عندنا جه وحل المشكلة
قال لنا "انا لو مش بحب البلد دى ح سبكم.. ولا فى جنس مخلوق ممكن يحاسبنى.. بس انتم صعبانين عليا قوى.. وواجبى اكمل طريقى معاكم للآخر حتى لو حارة سد"
مش كل الناس بتفكر بنفس منطقه.. وفى ناس بصة للنفوذ.. معاك..
لكننا لما نرجع ف الآخر نبص... ح نلاقى ان أمثال الراجل دة يجبرونا نكمل معاهم الرحلة.. بغض النظر مصر راح تدينا ايه
لانه واجبنا ندافع عن مالنا.. دا فرض مش واجب بس
وف الأول والآخر.. دا اختيارك يا كلام ويا كريم
ومش بمتهن دور الزعيمة الوطنية لانى اقل من كدة.. انما بقول لكم عن اللى شيفاه بفكرى المحدود لسا بتاع واحدة فى الجامعة غالبا شايفة الدنيا والباب موارب
بس اهوه... مين يعرف
:)
كريم : منور يا امحتب
بقالك فتره ما جيتش هنا
الميل وصل يازعيم وان شاء الله نبقى على اتصال دايما
بس بصراحه ما كانش عندى حاجه اقولها
لست ادرى : انا عارف الكلام ده ومؤمن بيه
بس
الواقع بيقول ان لازم اى حاجه نعملها يبقى لها مردود والا ما يبقاش ليها لزمه
ومش باقصد هنا المردود مادى وان كان ده مشكله فى مهن تانيه كتير
لكن الحمد لله بالنسبه ليا مناسب جدا
بس انا بافكر فى حق ابنى اللى جاى فى عيشه محترمه فى مكان محترم ما يكونش فيه معرض يتهان عشان مثلا شعره مش عاجب الظابط
الشرطه فى مصر فئه قذره الا من رحم ربى
من سنين السنين
وما فيش حاجه بتتغير
كان اعرف ناس اتنصب عليهم فى اكتر من مليون جنيه
تحقيقات البوليس كانت متراخيه وما جابوش النصاب لحد ما سافر وهرب
الراجل صاحب الفلوس انفعل وهو بيكلم الظابط
فالظابط قاله انت فى مصر
يعنى الامن امن سياسى وبس
انتى تعرفى بتحصل كام حادثه سرقه بالاكراه كل يوم
وفى شوارع كبيره زى مكرم عبيد مثلا
دى حاجات لازم كلنا نفكر فيها
مش انا بس
أبو الكلمات حبيبي
بداية آسف لتأخري في التعليق لكني أتابع لكن كان هناك موضوع يستولي علي
بالنسبة لموضوعك يا بو الكلمات يا جميل
البلد دي حبها ضارب في قلبي ألف جذر وجذر ويمكن ضاربني بالجزمة على قدر سيطرته عليَّ لكن أحبها بالجملة والتفصيل والترحال لم يقلل من حبها
سافر كيفما تريد وأينما تريد وابق على حبها لأنها تحبك أكثر من حبك لها
وأكيد هناك فجر يتملص من عتمة الزمن
لك ودي وحبي
انا اول مرة ادخل على السايت بتاعكم بس لفت نظري موضوع التفكير في الهجرةلأني كنت انا كمان بافكر فيه بعد اللي شايفاه بيحصل في البلد ، وعايزة اقولك اني رحت فعلا سفارة لدولة كبيرة علشان اخد الفيزا بس وانا على باب السفارة وقبل ماادخل حسيت اني جاية اشحت وطن عارف يعني ايه تشحت وطن كأنك مالكش مكان ف وطنك كأنك لقيط وفورا رجعت من مطرح ما جيت وقررت اني ما اكونش سلبية تاني وزي ماانت بتفكر في ابنك فكرت انا كمان ف ابني وابنك وولادنا كلهم وقررت ان ده وطني وماليش وطن غيره ولازم اعيش فيه غصب عن كل اللي عايزني امشي منه ، بالمناسبة وائل الابراشي اتحول فعلا لمحكمة الجنايات وبيدفع تمن جرأته لكن لسه بيقول رأيه بصراحة ومش خايف .. كفايانا خوف بقى علشان ولادنه و ادميتنا
Where did you find it? Interesting read » »
Post a Comment
<< Home